Bërnardin Drovetti

Nassù a Barbanià ant la sità metropolitan-a 'd Turin dël 1776, a l'é stàit un colessioneur e diplomàtich.

A l'era fieul d'un nodar, e apress jë studi 'd lese, cand ij fransèis ëd Napoleon a j'ero intrà an Piemont, a l'é anrolesse ant l'armà tanme volontari.

Ij sò mérit a l'han mnalo a vnì ofissial durant la campagna d'Egit e dël 1803 cónsol për la Fransa, an strenzend n'amicissia con ël wali egissian Mehmet Ali.

Ës governador egissian a l'ha scotà ij consej ëd Drovetti, për mné soa mission ëd modernisé l'Egit.
An cambi, chiel a l'ha concedù a Bërnardin ëd fé dle tampe për trové vej repert.

Drovetti a l'ha donch fàit dle tampe dzortut a Tebe, an tornand an Euròpa con n'archeujta 'd 8 mila tòch.
Chiel a l'ha proponù a la Fransa 'd Luis XVIII, ch'a l'é arfudasse, donch dël 1824, Carl Felis ëd Savòja a l'ha catà l'archeujta për 400 mila lire piemontèise.

La marcandisa a l'é stàita mandà a Genoa an gròsse cassie, peuj mnà a Turin, a l'Academia dle Siense, andoa Jean-François Champollion a l'ha dësgifrà ij geroglìfich, butand an pràtica soe dëscuèrte fàite mersì a la Colonëtta 'd Rosëtta con na quantità smisurà 'd test d'adoss egissia.

Soa archeujta a l'é stàita, ansem a cola 'd Donati, la nos dël Musé Egissi 'd Turin, ël prim dla stòria, fondà dël 1824.
Drovetti a l'é mòrt dël 1852 a Turin.