Musé Egissi

Musé sla siviltà dël Nil piassà a Turin, ël pi vej e lë scond pi gròss dël mond.

Stòria

Sò prim repert a l'é rivà a Turin dël 1630, visadì la taulëtta "Mensa isiaca", catà dal duca Carl Emanuel I 'd Savòja.

L'anteresse sturnicà da la taulëtta a l'ha mnà a na prima spedission an Egit, vorsùa da Carl Emanuel III dël 1759, mnà da Vitaliano Donati. Ij repert a son stàit prinsipalment statue.

L'ocupassion napoleònica dl'Egit a l'avìa portà l'Europa a l'anteresse vers la siviltà egissia.
L'archeòlogh piemontèis Bernardino Drovetti, al servissi dla Fransa, a l'avìa cujì pi 'd 7 mila oget.

Soa archeujta a l'é stàita smonùa a la Fransa ch'a l'ha arfudela, an përmëttend a Carl Felis, re 'd Sardegna 'd catela.

Dël 1824, le archeujte Donati e Drovetti, ansem a àutre euvre possedùe da Ca Savòja a son confluì ant ël Musé Egissi 'd Turin.

Archeujta

Ël Musé Egissi a l'ha pi 'd 40 mila repert:

• 24 mumie d'òm (cortisan e nòbil, pa 'd faraon) e 17 d'animaj (ibis, farch, gat, cocodrilo e serp);
• 700 papir antregh: ij pi avosà a son:
• Dlë siòpero, ël prim siòpero dla stòria, për j'artard dle rassion ëd mangé
• Eròtich, an stil umorìstich
• Tomba 'd Kha, architet, avosà për esse nen stàita tocà ant ël temp, a l'ha tut ël fardel d'adoss;
• Mensa isiaca, na taulëtta Roman-a dël prim sècol dGC, ch'a imita ij geroglìfich;
• Tèila piturà 'd Gebelein, la prima tèila an lin dla stòria;
• Statue 'd dé e faraon (Ramses II), ant la Galarìa dij Re;
• Lìber dij Mòrt, un tratà religios sël passagi al dëdlà;
• Dontré sfins.