Teofilo Sansòn

Nassù dël 1927 a Conejan, an provinsa 'd Trevis, a l'é stàit n'antrapreneur, stranomà 'l "Re dij giasset".

A l'era 'l dërié 'd dòdes frej; a l'é tramudasse a Turin dël 1948, e a l'é ancaminasse a vende giasset an biciclëtta për Pòrta Palass.

La riussìa 'd sò travaj a l'ha portalo a durvì un baracòt, fin-a n'usin-a a Colognola ai Colli, an provinsa 'd Veron-a an batend dël 1968 la Gelati Sanson, gigant italian dij giasset.

Dël 2000 a l'ha vendula a Barilla, che dël 2006 a l'ha vendula a Sammontana, ch'a l'ha chità 'd vende con la marca Sanson, an mantenend mach ij giasset Ringo e Sansonì.

Sanson a l'é stàit ëdcò un mecenà dlë spòrt: soa pi gròssa atività a l'é stàita 'd caté l'echip fotbalìstica dl'Udinese dël 1976 e 'd portela an Serie A da la Serie C.

A l'é stàit ël prim a taché messagi publicitari sle maje e braje dij giuvador, an pijand dle multe ma an durbend la strà a la publicità ant ël fòtbal.

Sanson a l'avìa 'dcò batì l'echip siclìstica Sanson-Campagnolo, an vagnand pi gare.
A l'era padron dle echip futbalìstiche Union Clodiense e Conegliano; l'echip ëd bala a nov ëd Civitaveja e cola 'd rugby 'd Rovigh, an vagnand doi scudet.

A l'é stàit laudà sivalié dël travaj da lë stat italian. A l'é mòrt a Veron-a dël 2014.