Erminio Spalla

Nassù dël 1897 a Ël Borg ëd San Martin, an provinsa 'd Lissandria, a l'é stàit bocseur, ator e cantant lìrich.

Fieul d'un paisan e mërcant ëd vin, a l'era tramudasse a Milan da fiolòt, andoa a l'é ancaminasse a dësvlupé soa passion për la scultura, fin-a cand a l'ha vëjù l'abòrd final tra Jack Jonhson e Jim Jeffries al cine, an-namorendse dla bòcs.

Tanme bocseur a l'ha vagnà 'l tìtol dij Paìs Interaleà dël 1919, l'italian dël 1920 e l'europengh dël 1923, prim italian a felo, con tant ëd felicitassion da Mussolini. A competìa ant la categorìa dij pèis màssim.

Na vira artirasse da la bòcs a l'é ancaminasse ant la cariera dël cine, partessipand an 53 film e ant ël carosel dël Brandy Fabbri, con regista tanme De Sica e Risi.
A l'ha 'dcò seguità soa passion për l'art, an fasend ël cantant lìrich a teàter, ël pitor e lë scultor.

Spalla a l'ha 'dcò combatù ant la prima e la sconda guèra mondial; tanme fantassin, paracadutista e magister ëd bòcs për ij bajet. A l'ha arsevù la cros al valor ëd guèra.

A la fin a l'é mòrt dël 1971 për emoragìa a Roma. Tra le gulie dël dòm ëd Milan a-i son le sculture 'd Spalla ansem a Carnera, vorsùe dal regim fassista.